Z Dešna/Dissen. Na njeźeli Quasimodogeniti, to jo lětosa był 24. apryl, su ewangelske kśesćijany swěśili 300. serbsko-nimsku namšu w dešańskej cerkwi. Tomu kóńcoju tyźenja se teke groni małe jatšy, což jo za faraŕku Köhlerowu była góźba, wšykne jatšowne spiwaŕki pšosyś namšu. To pśepšosenje su spiwaŕki ze Žylowa a Dešna raźi pśiwzeli a su zespiwali dwa kjarliža. To a wustup chora Łužyce stej dałej tej Bóžej słužbje wósebny muzikaliski ramik. Na tej namšy su jano spiwali serbske kjarliže. Namša jo była wótměnjata, dokulaž wšake aktery su se wobźělili. Maksimilian Hasacki jo lazował w serbskej rěcy epistolu, kótaraž stoj w prědnem lisće Pětša 3,9. We njej źo wó cile teje wěry. Jogo sotša Christin Hassackojc jo teke lazowała w serbskej rěcy, rozmjej ten ewangelium, kótaryž stoj pla Jana w 21. kapitelu.