Ze Strjažowa/Striesow. Gaž se něźi namakaju někake zajmne pisma abo dokumenty z wjelgin starego casa, pón pśidu wóni za wětšy źěł do muzeja, aby mógali luźe je tam wiźeś a wobźiwowaś. Z tym jo ta wěc pón wótbyta! Ale casy ma taki stary dokument hyšći drugi efekt, drugi wužytk. Rowno to smy dožywili něnt w Dešnje a Strjažowje. W Dešnje ga su w starej tyšaŕni namakali taku staru urkundu, a to z lěta 1922. To groni, až jo wóna lětosa rowno 100 lět stara. We njej móžomy cytaś: „1. Stiftungsfest des Sportvereins 1921 Striesow. Bei den Fussball-Diplom-Wettspielen siegte Turn- und Sport-Verein Dissen II gegen Striesow Sportverein 21 II. mit 1:0 und erhielt dafür diese Ehren-Urkunde. Striesow im Spreew., den 30. April 1922. Der Vorstand des Sport-Vereins 21.“ Pódpisali su to Pruske, Klaua a Noack, štempel tegdejšnego Strjažojskego sportowego towaristwa to wšykno wobwěsćijo. A górjejce na pismje su wiźeś styrjo mólowane balokoparje.