Picnjo/Peitz. Pśisamem kuždu sobotu zmakaju se kubłarje listowych gołubjow našogo regiona w Picnju. W domje towaristwa tamnych gołubjarjow pśigótuju wóni swóje ptaški na daloku drogu. Wóni pśidu z nimi tam, kontrolěruju slědny raz, lěc te pšawe gołubje sobu maju, a pón zawěraju je do wjelikich kašćikow. Slědny raz dostanu wódu, a gaž to wjelike nakładne awto pśiźo, pón jo zachopjeńk dalokego a tšachotnego drogowanja. Nowy Casnik jo se to raz woglědał...
Ceły lěśojski cas su wuběgowanja listowych gołubjow. Naslědku źo wó to, ceje gołubje te nejmalsnjejše su. Wó to wuběźuju se te gołubjarje towaristwa Reisevereinigung ‚Heimatliebe‘ Guben. We njom su zjadnośone towaristwa gołubjarjow z dogromady 10 jsow a městow. Pśipódla su serbske ako Turjej a Janšojce. Kuždy raz, gaž sćelu swóje gołubje na drogu, měrje kradu, kak malsnje wóni pśidu zasej domoj. A te nejmalsnjejše su na kóńcu te dobyśarje. Rownož na taki part popšawem konkurenty su, su te gołubjarje wjelgin pśijaśelne a pomocniwe mjazy sobu. Problemow maju južo drugich dosć, až njekśě sebje mjazsobu hyšći dalšne napóraś.