Z Picnja/Peitz. Pó dwěma lětoma pśetergnjenja korony dla jo pśišła Serbska wósada gromadu na jatšownu namšu do Picnja ako na wjeliki familijowy swěźeń. Wušej 50 namšarjow a namšarkow ze serbskich jsow a z Města jo pśichwatało drugi jatšowny swěźeń, aby słyšało dobru jatšownu powěsć wót górjejstawanja Kněza Jezusa Kristusa w serbskej rěcy. Zasej su mógali serbske zuki głosnje zazněś pó picańskej cerkwi. Ako w pjerwjejšnych lětach jo rozgłos RBB namšu nagrał za połdnjowe wusćełanje. Jatšowne gronko „Kristus jo górjej stanuł, jo napšawdu górjej stanuł“ jo było słyšaś pó serbsku a pó ukrainsku.