Aktualna diskusija wó móžnej změnje teksta serbskeje hymny glědajucy na zapśěgnjenje žeńskich se teke namakajo wjelgin aktualnje w kulturnem casopisu Rozhlad, ga we tuchylnem februarskem wudaśu. Komentar k tomu jo napisała Anja Pohončowa, ako reakcija k tomu, což jo Maćica Serbska njedawno ku tej temje wózjawiła (www.masica-serbska.de). Awtorka ma paralelne spiwanje originalneje a wobźěłaneje wersije za idealny pad. Mimo togo pokazujo na to, kótaru lěpšynu Dolnoserby ze swójskeju rěcneju wersiju teksta maju: „Och, gab muže stanuli...“, tam móžo se na městnje słowa „muže“ lažko zasajźiś słowo „luźe“, źož w górnoserbskej wersiji tak njefunkcioněrujo.

„Tak analogne kaž móžno a tak digitalnje kaž trjeba“ jo titel interviewa, kenž jo wjadła šefredaktorka Katrin Čornakec z Michałom Cyžom, sobuźěłaśerjom Załožby za serbski lud a zagronitym za medijowe zarědnišćo. Wón dajo wótegrona nastupajucy serbskorěcne medijowe projekty, aktualne a planowane, wó wuwiśu serbskego medialnego swěta – teke z glědom na Dolnu Łužycu.