18. až do 22. maja jo se wótměł lětny kongres FUEN we Wrocławje. FUEN jo Federalistiska unija europskich narodnych kupkow. Domiwina jo tam wót 1990 cłonk. Na lětosnem kongresu jo se wobźěliła z wjelikeju delegaciju. Teke młodostne se tam zasej pśipódla byli. Z Dolneje Łužyce jo to była Silva Oehlertojc z Janšojc. Dogromadu jo tam było 150 wobźělinkow z 27 krajow. Domowinu jo zastupił pódla Dawida Statnika, Bjarnata Cyža a wjele drugich Markus Końcaŕ.
Lětosa su ten prezidium nowo wuzwólowali. Pó źewjeś wuspěšnych lětach ako prezident njejo Hans Heinrich Hansen zasej kandiděrował. Nowy prezident jo Loránt Vincze, cłonk hungorskeje mjeńšyny w Rumuńskej. 89 tych 176 delegatow su dali jomu swój głos. Bjarnata Cyža su zasej do prezidiuma FUEN wuzwólili. Wón jo pśednjasł na kongresu financnu rozpšawu stareje legislatury.
Dla togo, až su wótměli ten kongres w Pólskej, su na tom kongresu tamne narodne mjeńšyny wósebny tema byli. Tam dajo na pśikład lud Karaimarjow, kótaryž ma turkojski póchad. Dogromadu dajo w Pólskej 13 mjeńšynow. Drugi wažny dypk jo była změna wustawow FUEN.