Z Łužyce/Lausitz. Za wjele projektowych iniciatorow, towaristwow, institucijow a komunow we Łužycy jo to źinsa samozrozumliwe, až se spěchuju serbska rěc a kultura w cełej bogatosći – lěc su to wustajeńce, koncerty, drastwy, pomniki, knigły, Witaj-projekty abo wědomnostne slěźenja – cesto pśez Załožbu za serbski lud.

Mógu se hyšći na to dopomnjeś, ako su ju 19. oktobra 1991 we Łazu w srjejźnej Łužycy na swětosnem zarědowanju załožyli, aby materielnu bazu za wobchowanje a dalejwuwiśe togo serbskego stwórili. Zgromadne wuzjawjenje ministaŕskeju prezidentowu Sakskeje a Bramborskeje a Zwězkowego ministaŕstwa za nutśikowne, źož jo se formulěrowało zaměr wutwórjenja jadneje samostatneje załožby, su tegdy pódpisali Kurt Biedenkopf, Manfred Stolpe a w zastupnistwje Angela Merkelowa.