Ze Zaspow/Saspow. Stwórtk tyźeń jo se zaspicke Drastwine a domowniske towaristwo we Frencelojc kjarcmje zmakało na wuzwólowańsku zgromaźinu, pód wuměnjenjami wótpowědnej 2G-regule. Tam su wuzwólili nowe pśedsedaŕstwo. Doněntne pśedsedaŕstwo – to stej byłej Bernd Kamjeńc a Gudrun Templinowa. Wónej matej něnto naslědnika, a to stej Jens Šmolka a Manuela Muellerowa.
Bernd Kamjeńc jo 22 lět ako prědny pśedsedaŕ Drastwinego a domowniskego towaristwa statkował, ga wót cełego zachopjeńka. 1999 su załožyli to towaristwo, a wažne póstarki za jogo załoženje jo rowno teke Bernd Kamjeńc librował. Ten mjaztym 68lětny, pśewšo angažěrowany Zaspowaŕ ze serbskeju familijoweju slězynu jo se powědanje serbskeje rěcy pśiswójł a to serbske se wjelgin wažy. Z pilnosću a wjelikeju zajmowanosću jo teke sobu źěłał na chronice zaspickich stawiznow, w kótarychž se wjelgin derje wuznawa, teke nastupajucy jadnotliwych zaspickich dwórow, a swóju wědu rad źěli. Do maja 2018, ako Zaspy njejsu hyšći wejsnu pśiradu měli, jo wón była ta wósoba, ako jo Zaspy napśeśiwo Městoju zastupiła.