Lube źiśi,

hyšći su ferije. Wjele póbitowanjow za źiśi jo było, teke za serbske źiśi. Cytajśo sami!

Projektowy tyźeń kulturneje akademije

Wósym źiśi jo se pśizjawiło za prědny tyźeń nazymskich prozninow, aby gromaźe spiwali a rejowali a wjele wjasela měli. Nejmłodše su byli šesć, nejstarše źiśi su byli jadnasćo lět. Na prědnem dnju projektowego tyźenja, to jo był 11. oktober, su se zmakali w Dolnoserbskej kulturnej akademiji na Žandojskej droze.

Tam su grali zeznawańske graśa, su prědny spiw wuknuli. Pótom su wen šli, aby w parku material za baslenje zběrali. A co su namakali? Dubjańki, kastanije a bejnu kopicu lista w nejrědnjejšych nazymskich barwach. Mimo togo su se woglědali wšake wót togo serbskego, kenž jo w bliskosći (Serbska cerkwja, Serbski běrtyl).