Lube źiśi,

tuchylu jo cas žnjownych swěźenjow. Kokot jo dnja 1. septembra Witaj-hort w Brjazynje swěśił. Wótpołdnja su se wšykne wukniki a wótkubłarje pśed šulu zmakali. Tam su južo wrota a kary na wuknikow cakali. Pó krotkem nagronje wótkubłarjow su źiśi zachopili. Gólcy su wopytali kokota łapaś a w samskem casu su źowća z karami slalom ganjali.

Dokulaž źowća su malsnje gótowe byli, su wóni teke směli pśez wrota ganjaś. Na wrotach wise pódla kokota teke słodkosći a małke dary. Nejpjerwjej su gólcy a źowća směli jano to tergaś, ako we jsy. Pótom jo był kokot na rěźe. Njejo dłujko trało a prědny dobyśaŕ, Oskar Jarik (Jarick, stwórty lětnik), jo głowu wóttergnuł. Na druge městno jo pśišeł Lukas Janc (Janz, tśeśi lětnik) a tśeśe městno jo Ryan Tšorn (Tschorn, prědny lětnik) sebje dobył. Wótkubłarje su weto śěžkosći z wrotami a z karami měli, dokulaž su pśemałe. Te słušaju źiśowni w Strjažowje. Nejwětše žycenje horta su swójske wrota, kary a serbske drastwy za źowća.