Z Bramborskeje/Brandenburg. W oktoberje swěśe kśesćijany „Źěkowanje za žni“. Tek wšym drugim njamógu žni wšojadno byś. Wšak jěmy wšykne kuždy źeń, to, což něcht jo za nas žněł a pśigótował.

Rolnikaŕske lěto 2020 njejo w Bramborskej optimalnje było, wjedra dla. Rozdźělowanje dešća jo było wšake wu nas, toś jo śěžko powšyknje groniś, kake te žni su byli. Rolnikarje w Bramborskej su lětosa 2,3 milionje tonow trajdy wótžněli, pišo Statistiski amt za Barliń a Bramborsku, pěś procentow mjenjej ako 2019. Majs jo wusoko stojał, ale bažule su se jano snadnje wuwili, smy zgónili w Janšojcach. Wó lanje jo nam powědał Raik Schmidt wót tšupcańskego lanowego młyna. Lan za jogo wólej rosćo w Dwórach (Dürrenhofe) a w Želmjach (Sellendorf). Žni tam su lětosa wjelgin dobre byli.