Z Bórkow/Burg. Dla korony njejo tak lažko, k wósebnym góźbam ako k mjazynarodnemu dnju muzejow teke wósebne póbitowanje wugótowaś. Ale Bärbel Šubertowa, wjednica Domowniskeje śpě w Bórkowach, jo sebje wumysliła póbitowanje, ako docynijo póstajenjam k wótstawkoju a k hygienje. Wótdaloka wóna buźo njeźelu, 17. maja, gósćam pokazaś, kak mógu pyšny bant (ako klucny bant, narucnik abo cytańske znamuško) ze sedym nitkow plasć. Póbitowanje jo za dorosćonych, młodostnych, a teke za źiśi wót šesć lět. Kuždy smějo swój pomocny srědk a swój bant domoj wześ.

Wót 23. apryla jo ta śpa zasej wótcynjona, móžośo tam wiźeś dwě trajnej wustajeńcy („Stawizny a pśitomnosć Bórkow we Błotach“ tak ako „Błośańska zeleznica“) a jadnu wósebnu wustajeńcu („Mójo nejrědnjejše rucne źěło“).