Z Města/Cottbus. W 75. jubilejnem lěśe pórucyjo Serbski institut (SI) wósebny rěd „Sorabistika pó droze“ a to jo Serbski muzej w Chóśebuzu rad pśiwzeł. Tak jo srjodu tyźeń wušej 25 luźi pśichwatało, aby zastupujucej direktorce SI dr. Susanje Hozynej pśi jeje pśednosku „Grozne póstawy w serbskich powěsćach a bajkach“ pśisłuchali. Wóna jo z wědomnostneje perspektiwy se rozestajiła z póstawoma pśezpołdnice a źiwego muža. Jo pśisłucharjam rozkładowała, kak su nastawali take póstawy wuźěsenja (Grauen) a wulěkanja a kótaru funkciju toś te wót generacije k generaciji dalej dawane powěsći su měli. Pśeto jo něga słužyło wulicowanje ako dalejdawanje wědy a tomu jo słušało teke warnowanje pśed tšachotami. Na pśikład jo pśezpołdnica mjazy drugim pśed górcotu pód połdnjowym słyńcom a z tym zwězaneju tšachotu šćitała.