Z Bórkow/Burg. Bórkojski Kurowy park jo był na dnju Nimskeje jadnoty połny woglědarjow, teke wjele gósći z bliskeje Reha-kliniki su póbyli pśi sćažkach a na ławkach. Z pitśku zaźiwanim su wobglědowali tu hupu, kótaraž jo se pó parku pógibowała: Kupka wót něźi 30 paršonow jo se pśewóźowała wót dweju jich wobkružujuceju rejowaŕkowu, k tomu jo zazněła sferiska muzika. Ale chtož jo dokradnje glědał a te how a tam wisece postery wiźeł, jo na to pśišeł, wó co how źo. Pśichwatane woglědarje su tak a tak wěźeli, za co su pśichwatali, pśeto ten performatiwny špacěr pó Bórkowach njejo był žednej mjeńšej wósobje pósćony ako Minje Witkojc. Serbska basnikaŕka jo měła swóje kórjenje w Bórkowach.