Chóśebuz/Cottbus

Wótwórjenje wustajeńce „Łužyske grajkanje z barwami“

Lodka pśepšosyjo stwórtk, 6. awgusta, zeger 18:00, na wótwórjenje wustajeńce „Łužyske grajkanje z barwami“ do klubownje Serbskego doma. Wiźeś budu twóŕby wuměłcowki Marita Wobser z motiwami łužyskeje krajiny a jeje pśemjenjenje, wjelerakosć serbskeje drastwy a teke pótajmny swět serbskich powěsćow. Zawjeźenje pśewzejo dr. Pětš Šurman a kupka Drjewjanki buźo wjacor muzikaliski pśewóźowaś.

Wustajeńca „Łužyske identity“

Na Grodowej droze 21-22, w rumnosćach měsćańskego labora Commoning Cottbus (krotko COCO) móžośo se hyšći až do kóńca awgusta fotowu wustajeńcu „Łužyske identity“ woglědaś, a to kuždu srjodu wót zeger 16:00 do 19:00.

Janšojce/Jänschwalde

Wótwórjenje wustajeńce

W janšojskem Serbsko-nimskem domowniskem muzeju wótwórijo se srjodu, 19. awgusta, zeger 18:00, wustajeńca pód titlom „14 x Jänschwalder Blasmusikfest/14 x Janšojski dujaŕski swěźeń“. Ku tej góźbje dožywijośo teke probu dujaŕskich gercow.