Z Města/Cottbus. „Serbske blido“ jo załožyła kuratorka Christina Kliemowa w lěśe 2007, aby se w Serbskem muzeju forum w dolnoserbskej rěcy k aktualnym pšašanjam we a zwenka Łužyce póbitował. Na to muzej wob lěto šesć raz pśepšosujo. Kuždy raz stoj za zgromadne rozgrono wósebna tema w srjejźišću. Teke wob cas wobnowjenja Serbskego muzeja su se zajmce k tomu zmakali. Jano wob cas korony jo Serbske blido wupadnuło. Někotare zarědowanja smy teke digitalnje pśewjadli. Gósći su byli dotychměst wuznamne wósobiny z kultury, politiki, wědomnosći, znate maminorěcne wejsanarje, kenž se za serbsku rěc na wšakorakich pólach angažěruju, gósći z wukraja a młodostne z našych jsow.

Serbski muzej planujo tež w pśichodnem casu format serbskego rozgrona dalej wjasć. To mjaztym 100. Serbske blido“ se wótmějo srjodu, 22. maja, zeger 18:00 w Serbskem muzeju Chóśebuz, na Młyńskej droze 12. Tema pón buźo: „Kak glědaju wuknice a wukniki na to serbske pó abiturje na Dolnoserbskem gymnaziju?“