Z Chóśebuza/Cottbus. W slědnych tyźenjach su wjele treněrowali, probowali a hyšći raz zwucowali. A něnto, dnja 12.06.2022, jo skóńcnje tak daloko było: źowća a gólcy z 6. lětnika zakładneje šule „Krabat“ w Janšojcach su měli swój wjeliki wustup pśi 22. bergaŕskem swěźenju w Knorawje na jawišću pód stanom. Pśi Gelsenkirchenskej aleji jo publikum dožywił pisany swěźeń z wótměnjatym programom. Rejujuce źiśi, kenž wuknu pla Berit Šodłoweje wót Dolnoserbskeje kulturneje akademije, su tam njeźelu wótpołdnja nałog „Hyś pó jatšownu wódu“ pokazali. Choreografija na wusokem niwowje jo twórił Dieter Wendisch. Źiśi su ze swójim šarmantnym a imponěrujucym pśedstajenim zagórili chóśebuski publikum.