Z Brjazyna/Briesen. Dnja 25 januara smy skóńcnje mógali ptaškowu swajźbu swěśiś. Našu swajźbu smy swěśili pitśku hynac. Źiśi brjazyńskego Witaj-horta su pupkowe graśe pśedstajili.

Pla nas njejstej sroka a wron se ženiłej. W Brjazynje stej kacka a kacor se ženiłej. Žaba ja naš póbratš był. Wón jo gósći wót wěrowanja až do party pśewóźował. K woglědoju su byli teke swinja, kokot, kóza, pjas, kócka, wuchac a hyšći wěcej.

Krotko a słodko jo swajźba kóńcyła. Naš njewjesćinski pórik jo glucnje do swójogo póswajźbnego casa wótleśeł. Snaź wiźimy se pśiducy lět zasej, bźeze korony a zasej z starjejšymi, kafejom a tykańcom.