Z Budyšyna/Bautzen. Na iniciatiwu w aprylu 1847 załožonego serbskego wědomostno-kulturnego towaristwa „Maćica Serbska“ bu prědny Serbski dom z pomocu wót Serbow, ale tek wót nimskich a wukrajnych pśijaśelow nazběranych pjenjez natwarjony. Twaŕske źěła na kulturnem zmakanišću Serbow pśi budyšyńskich „Lawskich hrjebjach“, njedaloko źinsajšnego Mósta měra, su zachopili 1897 a su se skóńcyli 26. septembra 1904 z wóswěśenim domu.
Ako Lucija Bejmina w swójom diplomowem źěle z lěta 1982 na Lipsčańskej uniwersiśe pód titelom „Ze stawiznow Serbskeho doma w Budyšinje. Projekt, natwar a kulturnopolitiska funkcija (1873–1956)“ pišo, jo pśichwatało na zjawne wótwórjenje domu něźi 1.000 gósći, mjazy nimi młoge „Serbja z wobeju Łužicow, duchowni, wučerjo, ratarjo a dźěłaćerjo, žony a holcy w krasnych narodnych drastach, hosćo ze słowjanskeho wukraja a zastupjerjo wyšnosćow [...] samo sakski kral a někotři z kralowskeho domu běchu mjez tutymi.“