Z Gołynka/Gallinchen. Naprěki muzejoju „Stara wejsna šula“ w Gołynku, pśi šoseji B 97, namakajo se „Landhaus zur kleinen Puppenstube“. To twarjenje jo Ottojc familija 1993 kupiła a wutwariła ku kjarcmje „Landgasthof Gallinchen“. 2010 jo Ottojc Eileen to familijowe pśedewześe pśewzeła, kótarež tak něnto w tśeśej generaciji se dalej wjeźo. Do kjarcmaŕskego žywjenja jo Eileen Ottojc pla swójeju starjejšeju kradu nutś rosła. Ta wukubłana hotelowa fachnica a kuchaŕka jo tomu gósćeńcoju, kenž nimsku domacnu jězu na kórśe ma, mě „Zur kleinen Puppenstube“ dała. W casu pśed pandemiju su how we wjelikem zalu, ak su łoni nowo wugótowali, teke narodniny a dalšne familijowe swěźenje měli. To něnt wšo wótpadnjo. Jano dwa luźa źěłatej we tej małej kjarcmje. Slědy pandemije su jim w bejnej měrje to wujźenje póśěžyli. „Smy wšo dołoj zareglowali. Njamamy žedneje wóry, teke chłoźece spižki w domje su wušaltowane“, wulicujo Eileen Ottojc. Tak jo ten gósćeńc pśez wjele mjasecow a nadalej hyšći zacynjony.