Z Hodźija/Göda. We tej wósaźe jo njespokojnosć wjelika, což jo Nowy Casnik južo pisał. We srjejźi stoj rozsuźenje Sakskeje krajneje cerkwje, wósady mjazy Hodźijom a Biskupicami (Bischofswerda) zjadnośiś. Serbske wósadniki maju starosć, až to serbske wordujo hyšći wěcej marginalizěrowane a woboraju se pśeśiwo tomu. Domowina (tak ako Serbski sejm) se angažěrujo we tej wěcy. Srjejź měrca jo se pśedsedaŕ Domowiny Dawid Statnik zmakał z Tobiasom Bilzom (wót 2020 krajny biskop sakskeje Ewangelsko-lutherskeje krajneje cerkwje) w Drježdźanach. Pódla jo był wušy cerkwinski raźc Thilo Daniel. Dawid Statnik jo wuzwignuł wažnosć cerkwje ako serbski rěcny rum a jo naraźił, se do rozgrona daś ze Serbskim wósadnym zwězkom, kenž jo pó Serbskej kazni teje cerkwje zastupnik nastupnosćow ewangelskich Serbow w cerkwi a zjawnosći. W rozgronje jo pśedewšym wó to šło, kak se wózjawjenje Bóžego słowa a dušepastyŕstwo w serbskej rěcy w nowej strukturje wósadow zawěsćiś a spěchowaś dajo.