Z Ranja/Großräschen. Pśi Rańskem jazorje, źož su we lěśe 2007 startowali pówódnjenje něgajšneje wugloweje jamy Murjow/Meuro, jo se juž młoge cyniło za turistiske wužywanje. Maju tam měsćański pśistaw, móst a wót Bramborskego architekturnego myta wuznamjenjone IBA-terase – a wěcej hyšći dej nastaś. Tamny pśibrjog jo krotko pśed dogótowanim. Rownož to jo se wě južo dobry kšac, njebuźo pak móžno, ten pśibrjog tak skóro wužywaś. Ceły jazor ga njejo hyšći za wužywanje wótwórjony, což ma cyniś z wódowym managementom. Jazor njejo hyšći gótowy glědajucy na wusokosć wódy. Pówódnjenje jo se tam nachylnje wopśestało – nejpjerwjej wóźi se w tom rožku Łužyskeje jazoriny wóda do bliskego Sedlišćańskego jazora.
Derje pak pśidu pśi Rańskem jazorje doprědka z drugim bydleńskim wobceŕkom „Ilse“ (až do 9. septembra 2011 ga jo se tomu jazoroju groniło „Ilse-See“). Prědne twarjarje domow su tam južo pilnje pśi źěle.
