Z Města/Cottbus. Pśi góźbje online-zapusta, dnja 27. februara, buźo se teke pśedstajiś nowy projekt z Chóśebuza. Casnikoju su kolektiw a cłonki, kótarež su wiźeś we wideo, pśipósłali sebjepśedstajenja.

Co jo „Kolektiw Wakuum“?

Smy kupka młodych serbskich a nimskich luźi ze wšakich stronow, kótarymž se co dolnoserbsku (sub-)kulturu spěchowaś. Nam jo nadpadnuło, až njedajo w Chóśebuzu žedno městno, źož mógu se młode Serby zmakaś a zwězaś pó wěcej alternatiwnej wašni. Mjaztym až dajo na górnoserbskem boce wjelike subkulturelne póbitowanje ze serbskim póśěgom, dajo za to jano mało w Dolnej Łužycy a Chóśebuzu. Pśi tom jo nam teke wažne se zwězaś ze strukturami, kótarež južo wobstoje w Měsće a w serbskem swěśe. Comy jadnorje stwóriś něco inklusiwnego a nowego, což dowólijo nowe wiźenje na serbsku kulturu. My se žycymy, až wóna se dalej wuwija, ako žywy źěl něntejšnego casa. Smy wótcynjona kupka z mało hierarchiju a comy luźi pśepšosyś se wobźěliś. Ako taki „wakuum“ comy cycaś dobre idejki a energiju wót wšych za wšych.