Z Pódstupima/Potsdam. Na swójo wósyme pósejźenje su se zmakali cłonki Rady za nastupnosći Serbow w Bramborskej pśez livestream.

Głowna tema jo była digitalizacija. Głowny wuběrk krajnego sejma wuźěła we wokognuśu strategiju za digitalizěrowanje kraja. Serbska rada pomina, až dejtej se wóna a referat 14 kulturnego ministaŕstwa (źož su zagronite za šulske pšawo a pšawo wukubłanja ceptarjow) pśi tom zapśimjeś. Cłonk rady Delia E. Münchowa wiźi we digitalizaciji wjeliki potencial za serbsku rěc a kulturu.

Tam jo nejpjerwjej serbska wucba we zakładnych šulach. Južo něnto jo wjelgin śěžko a samo njemóžno ju wšuźi tam póbitowaś, źož ma tradiciju a źož zajmce su. Wósebnje brach ceptarjow, ale teke mała licba zajmcow cesto dosć tomu zadora, aby pśewjedowali serbsku wucbu. Digitalizacija wótwórijo ceło nowe móžnosći. Nejpjerwjej jo móžno pśez distancnu wucbu teke z mało ceptarjami a wuknikami wucbu serbskeje rěcy zmóžniś. Njejo na taki part notnje, w kuždej šuli swójogo ceptarja za serbsku rěc měś.