Žywjenje towaristwow stagněrujo we Błotach a regionje, to južo wót slědnego nalěśa. Wustatkowanja korona-pandemije kaze źěło wšych organizacijow, ale kužda ma drugu perspektiwu na aktualny cas.

W Bórkowach jo Aline Gubelic šefowka Domowinskeje młoźiny. Wóna wiźi mjazy drugim kšutu zwězanosć młodych cłonkow wobgrozonu. „Tak ako łoni smy wjele wótgronili. Zarědowanja kaž zapust abo stajanje majskego boma a tak dalej njejsu móžne. Lětna głowna zgromaźina w nowembrje jo hyšći škricka naźeje była, ale mjaztym mamy wjeliki problem gromadu źaržaś młoźinu. Snaź móžomy lětosa nanejmjenjej kokot swěśiś, ale to teke njejo wěste.“