Gano som dostał prědne wudaśe kulturnego magacina „Melodie & Rhythmus“ lěta 2021 (Magacin M & R jo mjazy drugim w knigłaŕni na chóśebuskem dwórnišću na pśedań). W srjejźišću pśinoskow jo stojało kulturne a politiske wuwiśe USA w casu pód wjednistwom Donalda Trumpa. Pśi cytanju som se ned spominał na Cathy Petersen z US-stata Iowa. Som ju zeznał pśed razka źaseś lětami w Domowniskem muzeju Dešno. Dokulaž jeje prědowniki su Dolnoserby, źěła we wólnem casu za towaristwo „Iowa Wends“. Ako jo Donald Trump w lěśe 2016 prědny raz za amt prezidenta USA kandiděrował, jo mě pisała, až ma jogo za fašistiski, Hitleroju pódobny.