Z Grodka/Spremberg. 14. decembera jo wumrěł něgajšny šołta Egon Wochac (Wochatz), wón jo wordował 84 lět stary. Wón jo w zachadnych lětźasetkach sobu stwórił politiske rozwězanja togo města a wokrejsa Sprjewja-Nysa. Žywjenje dłujko jo se zasajźił za drugich. W śěžkem casu pó politiskem pśewrośenju jo šanse wužywał, ab doprědka spórał swójo město, a jo rano spóznał wóznamjenje serbskeje rěcy a kultury za Łužycu a jej spěchował w 1990ych lětach w šulach a źiśownjach. Na kóńcu jo stojało załoženje Serbskeje rady za Grodk a wokolnosć w aprylu 2001. Cłonki su byli pśedsedarje Domowinskich kupkow, drastwine towaristwo „Grodkojski swajźbaŕski śěg“ a wucabnice serbšćiny. Egon Wochac jo to pódpěrował, wšak jo kśěł woplěwaś serbsku rěc a nałogi we swójich stronach. Wón jo spěchował dwójorěcne wutoflowanje w měsće a jsach kótarež słušaju ku Grodkoju. Cesćenje jo se dobyła Grodkojska drastwina kapała, ako Egon Wochac jo jogo wjednika a dirigenta Siegfried Kalwaka (Kalwack) wumjenił ako měsćańskego muzikowego direktora.