Z Města/Cottbus. Korona-kriza jo Serbskemu muzeju w Chóśebuzu śěžki cas pśinjasła. Weto jo muzej na kóńcu slědnego lěta něco wjelgin pozitiwnego dožywił: Jo dostał wósym dalšnych mólbow Fryca Latka, nejwuznamnjejšego dolnoserbskego mólarja 20. stolěśa.

Dnja 7. februara 1895 w Nowej Jsy roźony Fryco Latka słuša k małej gjarstce serbskich intelektuelnych, ako su wopšawdu za serbski lud swójo wuměłstwo wugbali. Latk jo we Weimarje wuměłstwo studěrował a jo se tam pón trajnje zasedlił. Pśed Drugeju swětoweju wójnu jo wón był cłonk prědnego zjadnośeństwa serbskich twórjecych wuměłcow a wót 1948 cłonk naspjet nałožoneje Źěłoweje kupki serbskich twórjecych wuměłcow. Z teje kupki su jogo 1954 wustarcyli, jogo wašnju mólowanja ga su za dekadentne měli, wón njejo kśěł se pó idealach socialistiskego realizma měś. Weto jo Latk až do smjerśi w lěśe 1980 za Serbow statkował ze serbskeju domownju zwězany wóstał. Wón jo jano dolnołužyske krajiny mólował – pśecej we atelierje, na zakłaźe skicow, wót 1941 głownje we wašni starych mejstarjow.