Witaj, Gregor! Nejpjerwjej cu rada pšašaś: Kak to jo ako redaktor za muziku a kulturu pla Bramborskego serbskego radija rbb? To ga ty sy wót septembra togo lěta. A kak jo to źěło rowno něnto pód wobstojnosćami pandemije?

To źěło jo wupominajuce a rědne! Ako zagronity za muzikowe programy, muzikowe produkcije, koncerty a dalšne kulturne temy mam kradu wobšyrny a wótměn-jujucy horicont. Ja ga teke cynim pśinoski a wusćěłanja a moderěrujom. Ale to nejžrědnjejše jo, až móžom sam iniciatiwy na nogi stajiś, nowe projekty sebje wumysliś, a teke něco do serbskeje a łužyskeje kulturneje krajiny daś. Korona ma kradu wjeliki wliw na našo źěło. Musymy wótstawk doźaržaś, wjele se wótměwa internje něnto digitalnje, w homeoffice a tak dalej. Ale nejwěcej se wě markujomy, až njedajo zarědowanja, až pśesunjo se wjele aktiwitow do digitalnego abo teke do njeformelnego swěta. Ale za to teke my nowe formaty namakajomy, aby swójich pśisłucharjow dojśpili.

W pśedgódownem casu ga se wjasele pśisłucharje Serbskego radija na rozgłosowy adwentski koncert. Kak dłujko wobstoj južo toś ta tradicija ?