Ze Slěpego/Schleife. Pokorna Heidemarie Rychtarjowa se cujo pócesćona. „Som była pśechwatana. To su se teke druge zasłužyli“, měni 68lětna Slěpjanaŕka k jeje wuznamjenjenju ze znamuškom Domowiny. Wót 2014 nawjedujo Domowinsku kupku Slěpe. A wót 2014 jo pókładnica we wót 1992 eksistěrujucem Spěchowańskem towaristwje Serbski kulturny centrum Slěpe z. t.
„Póchadam z Mužakowa“, groni rentnaŕka. „Tam som do šule chójźiła. Serbske nałogi njejsom znała.“ Na Serbskej rozšyrjonej wušej šuli w Chóśebuzu jo wuknuła dolnoserbski. Tam jo wóna zmakała swójogo cłowjeka Hartmuta (67). Pśez njogo jo wóna namakała pšawy zwisk k serbskej rěcy, pśedewšym pśez jogo starku z maminego boka, Jakubikoc Magdalenu. Wóna jo se naroźiła 1905, jo doma slěpjańsku serbsku rěc wšednje powědała a jo wšednje burska chójźiła.