Južo wót lěta 2019 wjeźo gołkojska pratyjka (lětnik wjelikeje gołkojskeje gmejny) pó lěśe. Wudawaŕ jo interesowe zjadnośeństwo za domownisku historiju w Gołkojcach. Gano su wótedali manuskript za wudaśe za lěto 2021. W Schiemencojc śišćaŕni w Chóśebuzu, kótaraž ma gołkojskego wobsejźarja, se śišći něnto brošura, kótaraž ma 156 bokow. Wóna buźo k adwentoju na pśedań, w radnicy, na posće w Gołkojcach a w bibliotece.
Pódla kalendarja su zasej wšake gołkojske tšojenja cytaś. Lětosa na pśikład jo „dodank“ wó Pawlinje Krawcowej. Rozmjej: Gasertojc Ramona jo za tu pratyjku južo łoni něco napisała wó roźonej Dalicanaŕce Renusojc Pawlinje (ako se jej do manźelstwa hyšći groniło). Wóna Pawlina jo wótrosła w Gołkojcach, źinsa mamy ju za stwóriśelku pupkow z burskimi drastwami.
Wóna jo se cas žywjenja zasajźowała za Serbow, jo protestěrowała pśeśiwo germanizaciji. Do popajźeństwa su ju 1938 spórali. Popajź jo zawóstajiła swóje slědy, a 1941 jo wóna toś wumrěła, swój slědny wótpócynk ma w Gołkojcach.