Lube źiśi,

źinsa pišomy wjele wót knigłow w „Casniku“. Teke ja pišu Wam wót knigłow. Ale ně: Knigły to njejsu. To jo skerjej zešywk. Tam jo wjele basnjow namakaś. Teke rědne bildki su pódla. Wšykno jo za źiśi. Wšykno jo za wšake góźby w źiśowni, w horśe, w šuli abo doma. Zešywk jo Rěcny centrum WITAJ (RCW) w Chóśebuzu wudał. To su lubosne basni ku góźbam, ku kótarymž źiśi cesćej pśigótuju programy, na pśikład źeń źiśi, źeń mamy, źeń nana abo źeń starkeje a starkego. Wšak jo słyšaś było, až za take programy pśecej feluju wótpowědne basni. Awtory a awtorki su Jill-Francis Ketlicojc, Pětš Janaš, Erika Janowa, Michał Nawka, Miła Nagorina. Młoda basnikaŕka Jill-Francis Ketlicojc jo wětšynu basnjow zbasniła. Teke pla basniskego nestora Pětša Janaša comy se wuźěkowaś, ako jo někotare basni dodał. Ilustrěrowała jo knigły Marion Kwicojc. By se wjelgin wjaselili, gaby how a tam baseń z toś tych knigłow słyšali. Skazańske cysło jo  P-0/299/20.