W rěźe „30 lět nimska jadnota w Serbach“ smy južo wšake pśinjasli w slědnych tyźenjach. Pšawy kaleidoskop serbskego žywjenja jo nastał, a hyšći njejo žeden kóńc. Tenraz cytaśo rozpšawu wót Christophojc Rosemarie. Wóna jo była z pśijaśelku w Barlinju a jo se woglědała swětowy „show“ (rozpokazowanje) pśi Bramborskich wrotach. To jo było pśigótowane pśi góźbje 30. jubileja Nimskeje jadnoty.

Pśewšo rědko smy se wufajnowali „pó burskem“ w zachadnem lěśe, našu rědnu serbsku drastwu njejsmy se cesto woblakli. Tak smej se groniłej jadna tej drugej, Gabi a Rosi wót „Rejowańskego ansambla Barbuk“.

Smej wiźełej póbitowanje wót chóśebuskego „Reiseclub“ z titelom „Faszination Berlin“. To jo wopśimjeło dwě pśenocowani w hotelu „Adlon“ pśi Bramborskich wrotach a kafejpiśe w głažanej kupli Wjaže wótpósłańcow (Reichstag). Wušej togo su pšosyli na jězd pó měsće a jězd pó rěce na łoźi, źož jaden pśijěźo historiski centrum Barlinja a běrtyl kněžaŕstwa.