Z Bórkow/Burg. W 46. wudaśu Casnika smy wózjawili baseń Miny Witkojc „Což jo w redakciji se zjawiło“ k jeje dnju zamrěśa. Teke druge su našu Minu wucesćili. Cłonki zwězkowego źěłowego zgromaźeństwa (BAG) etniske mjeńšyny Birgit Kaufholdowa, Petra Koarkowa a Renata Harkowa su se dojěli do Bórkow a su połožyli wěnc do jeje rowa. Witkojc jo jadna z nejwuznamnjejšych serbskich awtorkow. Jeje basni wuzwigaju zwězanosć z Błotami. Toś jo Bramborska 2018 k prědnemu razoju myto „Mina Witkojc“ wuźěliło. Z mytom se pócesćuju wuběrne wugbaśa k wužywanju, pósrědnjanju a dalejwuwiśu dolnoserbskeje rěcy.