Z Lubnjowa/Lübbenau. Aby se pokazało, kake bogate lokalne wuměłstwo jaden region bitujo – za to su dny wótwórjonego ateliera idealna góźba. A taka góźba jo w Bramborskej był slědny kóńc tyźenja. Toś jo Nowy Casnik se z luštom na wuměłstwo wupórał, jo se jadnu městnosć z wótwórjonym atelierom wupytał a se tam rozglědował: Rozmjej we lubnjojskem kulturnem centrumje „GLEIS 3“, źož towaristwo LÜBBENAUBRÜCKE z.t. ma swójo sedło.

Łoni, ako su byli wótwórjone ateliery w Bramborskej normalnje na kóńcu tyźenja w maju, su pśi „GLEIS 3“ mimo wuměłstwa teke tykańc, kafej a muziku ako pówabki za woglědarjow měli. Lětosa, ako ateliery su se akle w oktobrje wótwórili, pó pśesunjenju termina dla korony, su musali wjele togo tšuś, což wacej jo normalne było. Woglědarje su musali se do kontaktoweje lisćiny zapisaś, su směli jano z nagubkami do ateliera we „GLEIS 3“ stupiś, a teke te tam swóje twóŕby prezentěrujuce wuměłcowki su musali nagubk na se měś. Su źiwali na wše płaśece korona-pšawidła.