Ze Złego Komorowa a Klinki/Senftenberg a Klinge. Wjednistwo Łužyskego srjejźnonimskego górniskego towaristwa (LMBV), prědkstojaŕ Gózda/Gosda gmejny Łukojce a zastupniki domowniskego towaristwa Klinka ako teke interesowe zjadnośeństwo Klincańske jazoro su diskutěrowali wó pówódnjenju Klincańskego jazora. Pśicyna jo był pśeźěłany hydrogeologiski wjelikorumnostny model (HGM), pó kótaremž Klincańske jazoro njedojśpijo planowany dokóńcny niwow wódy wót 71,5 mejtari normalneje wusokosći nule (NHN) nad móŕskeju głaźinu. Wjele njerozwězanych problemow jo pśi tom jasnych było. Planowany niwow Klincańskego jazora by se jano dojśpił pśez trajny pśiwód wódy z Tšawnice. Pó něntejšnem stawje buźo srjejźny dokóńcny wódny niwow lažaś pśi 68,6 mejtari nad nulu wót móŕskeje głaźiny, něnt pak lažy wón pśi 53,3 mejtarjach. „Rozestajamy se něnt z pšawniskimi pśedpisami, kótarež ma něnto LMBV rozjasniś“, jo gronił Bernd Sablotny, powědaŕ wjednistwa LMBV. Twarjenje pśiwóda jo se wótstarcyło.