Z Města/Cottbus. Dwa raza wob mjasec pśiźo znaty ceptaŕ, pśestajaŕ a dobry znajaŕ našeje dolnoserbskeje rěcy Erwin Hanuš „Nowy Casnik“ pópšawjat pśed tym, až źo serbski tyźenik do śišća. Ako korektor wón se wuměnja z Horstom Adamom a Adelheid Dawmoweju. Casy laže wurězane wobalki ze znamkami na bliźe, za kótarymž wón sejźi. Lažece znamki a wustajeńca wó znamkach w budyšyńskem Serbskem domje, kótaraž jo se pśed pór mjasecami pokazała, su mě pózbuźili, se z nim wó znamkach rozgranjaś. A pśi tom som ned zgónił, až se Erwin Hanuš teke za zběranje znamkow žagli. Mimo lubosći k serbskej rěcy jo se južo wót srjejź 60tych lět zajźonego stolěśa pśi njom z górjejce pomjenjoneje škricki płomje za zběranje znamkow rozpaliło.