Z Bórkow/Burg. Rainer Rejnus jo kśěł 2020 swój pśistawowy swěźeń we wětšem, dostojnem ramiku swěśiś. Pśeto južo wót 30 lět wobstoj jogo cołnowaŕnja na kóńcu Drogi k błośańskemu groźiku/Waldschlösschenstraße w Bórkowach. Korona jo te plany pak znjemóžniła. Weto njejo ten pśedewześaŕ se swěźenja cele zbyś. Něco rědnego ga jo na nogi stajił slědnu njeźelu.

„Smy pšosyli na familijowy swěźeń a smy pśi tom na wšykne wótstawkowe a hygienowe pšawidła źiwali. Nam jo wažne, zajm na nas chyliś, my se žywimy wót gósća“, groni 58lětny gósćinaŕ. Pitśku muziki, sušona ryba, mlince, cerwjena limonada a piwko – to su byli pśicynki za to mini-zarědowanje. K tomu hyšći cłonki Domowniskego a drastwinego towaristwa, ako su stog składli, a tśi błośańske bajawki w rozgronje. To jo se woglědarjam spódobało, teke bźez tradicionelnego cołnowego korsa. „Smy to nejlěpše z teje situacije cynili. Jo rědne, až su pśišli dowolarje, ale teke wjele pśijaśelow“, wjaseli se Rejnusojc Rainer.