Z Wochoz/Nochten. Łužyski park zanjasonych kamjenjow we Wochozy jo tek w casu korony wótwórjony, a to južo wót 4. maja. „To nejwažnjejše jo, až su naše sobuźěłaśerje a towaristwowe cłonki strowe pśez ten cas pśišli. Park jo bóžko był pór tyźenjow zacynjony. Njejsmy mógli pśewjasć naše tradicionelnje zarědowanja“, rozkładujo Anita Šwitalina (Schwitalla), zagronita za marketing a zjawnostne źěło Spěchowańskego towaristwa „Lausitzer Findlingspark e.V.“.
Wažne lětne terminy su musali dla korona-pandemije wótgroniś – mjazy drugim nalětny swěźeń (dnja 29. měrca), familijowy swěźeń jatšownu njeźelu, wobźělenje na Łužyskich jazorinych dnjach 2020 (dnja 25. a 26. apryla), źeń kamjenjow (7. junija), lěśojskej koncerta (dnja 19. julija a 23. awgusta) tak ako Gólny swěźeń („Heidefest“, dnja 6. septembra).
„Śim wěcej se wjaselimy, až něnto se wrośijo normalita do našogo parkowego žywjenja. Wót zasejwótwórjenja jo južo wušej 15.000 gósći k nam woglědało“, dajo zagronita za zjawnostne źěło k wěsći.