Z Barlinja/Berlin. Lěśe. Wótere laže na słyńcu pśi jazoru, druge glědaju telewiziju, tśeśe kólasuju. Wieczorekojc familija pak jo se na drogu pórała. A to nic pó asfalśe, ale pó wóźe. Kajakowanje pó serbskej Sprjewi jo trało źewjeś dnjow a jo dokóńcowało slědnu sobotu połdnjo. Wieczorekojc Kazymir, Nina a Gregor su se jano z mócu swójich musklow 145 kilomejtari pśez wódu do Barlinja pórali a kradu wjele dožywili, słyšali a wiźeli.

Sprjewja jo jich wjadła z Chóśebuza do Górjejcnych Błot a Kupaŕskich Bórkow. Pón su wjasłowali tek pśez Lubnjow, Lubin, Dołojcne Błota, Wódowy Grod, kanal k Damnej – jazoro Köthener See, Serbski Bukojc/Märkisch Buchholz (wót how pó Damnej), Prieros, jazoro Dolgensee, Gussow, Bindow, jazoro Krüppelsee, Königswusterhausen, jazoro Ziethener See, Schmö-ckwitz (barlinska granica), Köpenik (zasej pó Sprjewi), Oberschönweide, pó Teltojskem kanalu a napóslědku Tempelhofske wustawadło.