Z Mósta/Heinersbrück. W Mósće stej w junija byłej dwě wósebnej namšy. To prědne jo było to tšojne dupjenje sobotu, 13. junija. Tśoch gólcow ze Šmitojc roda jo faraŕ Kśenka na tom dnju wodupił. Mjazy nimi jo był młoźeńc Tim Šmit z Mósta. Wón jo 15 lět a jo wuknik Dolnoserbskego gymnaziuma. Wót slězynow jogo dupjenje lazujośo spózy. Młody wšak jo, ale jo južo pśewzeł amt organista a grajo orgele, gaž namša jo w Mósće, a mjaztym teke w Turjeju. Na dupjenju jo jogo ceptaŕ wót konserwatoriuma grał, João Segurado. Pódla orgelow a spiwanja wósady stej Kathi Sprigodojc a Josephina Schindelojc wustupiłej. Kupka „Hegeleicht“ z Baršća/Dubrawy jo modernu muziku grał. W spiwaŕskem łopjenu za tu namšu su tek stojali serbske kjarliže, ako „Ty Bóžo, žywjenje sy dał“, ako jo juž cesćej był słyšaś na dwójorěcnych dupjenjach. Teke wót kjarliža „Daś zwarnuj, nas Bog“ su spiwali serbsku štucku. Ten kjarliž bu pilnje wuspiwany na lětosnem jatšownem spiwanju, źož teke Katja Büttnerowa jo pódla była, ak jeje sotša Julija w zachadnych lětach.