Z Budyšyna/Bautzen. Pśecej zasej rozwjaselijoš se, gaž wiźiš Kristinu Nerád na programach Serbskego ludowego ansambla a dalšnych kulturnych a wuměłskich kupkow moderěrowaś. Publikumoju fasciněrujo jeje wustupowanje z jeje zmilnym a pśijaznym głosom. Toś ten zamóžo moderatorka pśecej zasej pśi zarědowanjach do wěsteje zgromadnosći publikuma z wuměłcami na jawišću zwjasć. 49lětna Kristina Nerád se na to gódnośenje wjaseli. Ze swójim manźelskim Pawołom ze Słowakskeje bydli w bydlenju, źož jo Arnošt Muka do swójeje smjerśi 1932 bydlił.

Južo rano jo wótekšyła swóju lubosć k baletoju. Južo 1976 jo se pśizjawiła na ludowuměłsku šulu w Jenje a z wósym lětami jo wustupiła prědny raz na jawišću měsćańskego źiwadła w Jenje z folkloristiskeju źiśeceju reju. A pózdźej z 13 lětami z klasiskim baletom. Ako wuknica jo Kristina chójźiła wót 3. lětnika do rědownje z profilom wósebnego kubłanja w rěcach nimšćina, rušćina a engelšćina a wót 10. lětnika na Rozšyrjonu wušu šulu Johannesa R. Bechera w Jenje.