Z Wětošowa/Vetschau. Tak ako wšykne wuměłce a kulturniki śerpje teke muzikarje pód tym, až dla korona-situacije jim feluju móžnosći wustupowanja a probowanja. Jadna móžnosć jo se wušykowała w ramiku mjazynarodnje nastatem formaśe balkonowego koncerta. Ta ideja jo se teke dwěma wětošojskima muzikarjoma kradu spódobała a wónej stej iniciěrowałej južo dnja 22. měrca togo lěta prědny taki koncert we wětošojskem měsćańskem źěle Njabožkojce. Tencas jo hyšći kuždy za sebje muzicěrował: Melitta Broßowa na jadnom dwórje a Sven Kuhla na drugem dwórje – ten južo za jsu, na ku Bórkowam słušajucem Karolininem dwórje .

Muzika, ako pśez cełu wjas zni, a k tomu hyšći njeźelu wjacor, luźi pśiwabijo. Jich aplaws jo motiwěrował muzikarjeju k dalšnym a pšawidłownym wustupam. Skóro stej se hyšći Heiko a Kilian Schneider k tyma prědnyma iniciatoroma pśinamakałej, a wót togo wóni zgromaźe na galeriji Adelininego dwóra („Adelinenhof“) we Wětošowje muzicěruju – kuždu njeźelu wjacor.