Lube źiśi,
kak se źo? Sćo strowe? Co cyniśo w lichem casu?
To jo nam wulicował Timo Pipka: Timo bydli we Wjerbnje. Wón jo sedym lět stary. Wón chójźi južo do šule, w Bórkowach. Timo ma teke pśedmjat serbšćinu. Serbske nałogi teke póznawa we tej šuli, zapust a kokot. Rad grajo wón z pśijaśeloma. Tom a Paul stej jogo pśijaśela. Wósebnje rad kopjo wón z balom. Wón samo grajo w towaristwje! Wón jo zachopił w towaristwje „SV Werben“, ako jo był styri lět stary.
Rad jo Timo pla starkeje. Starka bydli w Prjawozu. Pla starkeje móžo wón wence graś. Luba starka ma teke kokošy. Wósebnje lube su kurjetka. Kurjetko wzejo Timo młogi raz do rukowu.