Z Města/Cottbus. Tak ako kužde lěto maju něnto južo wšuźi kalendarje na sćěnu za pśiduce lěto na pśedań. Jaden jo pśecej pisanjejšy a rědnjejšy ako ten drugi, a jo pón śěžko, se wupytaś ten pšawy. W tej wjelikej licbje su južo abo hyšći budu w blišem casu žedne serbske abo łužyske. Mimo znatego kalendarja „Mója domownja“ z Ludowego nakładnistwa Domowina (LND) w Budyšyje jo to kalendaŕ „Lodka křinja – Sorbische Kostbarkeiten“. To pak njejo ten, ako su wudali w casu DDR a hyšći žedne lěta pó 1990 – ně, to jo kradu nowy, ale ze samskim titelom. Jen zestajijo a wudawa Załožba za serbski lud a to konkretnje Serbska kulturna informacija LODKA w Chóśebuzu. Dotychměst su jen južo tśi raze wudali. Prědny raz za lěto 2019 a to z reprodukcijami wobrazow serbskich a łužyskich mólarjow. Za 2020 běchu se za kuždy mjasec wupytali rědne pyšnotki łužyskego rucnikaŕstwa. A w nejnowšem kalendarje za lěto 2021 namakajomy stare historiske fotografije, na kótarychž jo serbske wejsne a kulturne žywjenje w starych casach zapópadnjone. Te su dostali wót Heika Loberta, sobuźěłaśerja serbskego nakładnistwa w Dolnej Łužycy.