Z Města/Cottbus. Bioloda „Ährenkranz“ abo pó serbsku Kłoskowy wěnc lažy něnt na droze Franca Mehringa 15. Wót slědnego stwórtka pśiwitaju Alexander Schömmel a jogo 15 sobuźěłaśerjow kupowarje w prědnem fachowem biowobchoźe w Chóśebuzu.
Wót 2015 jo Alexander Schömmel wobsejźaŕ toś teje lody. Za tym až jo „Ährenkranz“ wopušćił swój znaty domicil za Nimskeju cerkwju z 200 kwadratnymi metrami, stoje biowochodoju 850 kwadratnych meterow k dispoziciji.
Pórucone su wšakorake produkty z tak pomjenjonego demeterowego rolnikaŕskego zwězka. Demeter z.t. jo nejstaršy biozwězk w Nimskej. Južo 1924 wobgóspodarjuju demeterowe rolnikarje swóje póla na biodynamisku wašnju. Na bazy žywego kołowrotnego wobgóspodarjenja gódnośi se demetrowe rolnikaŕstwo ako nejtrajnjejša forma wobgóspodarjenja zemje a dopołnijo wěcej ako pšawidła ekologiskego póstajenja Europskeje unije.