W tych casach korona-pandemije jo to w Měsće tuchylu kradu depriměrujuce. Togodla stej mój pśijaśel a ja se rozsuźiłej, až kóńc tyźenja se wupórajomej wen do pśirody, źož lěbda luźe su, lěbda riziko wobstoj, a źož se pitśku lichej cuś móžomej. Ako cil smej se wupytałej Kalawsku Šwicu, źož wobej njejsmej do togo hyšći byłej.

Kalawska Šwica – to su strony šćitaneje pśirody k pódpołdnju města Kalawa. Geografiski jadna se wó wuběžk Dolnołužyskego wala (Niederlausitzer Landrücken), a ta nejwuša wušyna jo how z 161 meterami góra „Kesselberg“.

Ako pśitocnišćo (Einzugsgebiet) wjele žrědłow a ako biotop su toś te strony wažne za zdźaržanje bliskeje gatoweje krajiny Bukowinka tak ako bagnow, rěckow a dalšnych mokšych terenow. Dajo źělny wobłuk, źož wudobywaju jědernik.

Wót nowembra 1996 stoj Kalawska Šwica na póstajenje wokrejsa Górne Błota-Łužyca pód šćitom. Wobdana jo wót wjaskow Wjelchna (Plieskendorf), Wjerchownja (Werchow), Kobla (Cabel), Žytym (Settinchen), Gózna (Gosda), Swětow (Zwietow), Wusoka (Weißag) a Bukowinka (Buchwäldchen).