Z Budyšyna/Bautzen. Pśedsedaŕ Domowiny Dawid Statnik jo na koronawirus schórjeł a pśebywa doma we izolaciji– to jo wón k wěści dał we powěsći, kótaruž casnikaŕski powědaŕ Domowiny jo medijam rozpósłał. „Chwaliśboga, jo korona za mnjo jano kaž pśezymnjenje“, pišo Statnik. Pśi tej góźbje jo wón wugronił rozměśe, až to wjelike jatšowne rejtowanje we katolskich wósadach jo tuchylu wótpowěźone. Pśeto to jo teke nowa powěsć, kótaruž jo budyšyńska landrotownja wałtoru rozzjawiła: Jatšowne procesiony su zakazane.

Hyšći pór dnjow pjerwjej smy z krejzow jatšownych rejtari zgónili, až wóni se dalej na jatšy pśigótuju, se naźejucy, až nanejmjenjej we pśeměnjonej formje budu móc se na kónjecem procesionje wobźěliś. Tu naźeju pak jo jim Sakska krajna direkcija rozbiła: Zjawne a nje­zjawne tšojenja a zgromaźenja luźi wóstanu až do 20. apryla zakazane.