Ze susednego bliskego českego kraja jo se dostała tužna powěsć do serbskeje Łužyce, teke do Dolneje Łužyce. Tam jo zwěrny a wjeliki pśijaśel Serbow na kóńcu februara wumrěł. Jomu se groni dr. František Vydra a wón jo był 86 lět stary.

Česki spisowaśel a basnikaŕ Milan Hrabal z Warnoćic (Varnsdorf), ako jo rowno taki wjeliki pśijaśel Serbow, jo w górnoserbskem casniku „Serbske Nowiny“ spomnjeł na zamrětego dr. Františeka Vydru: Wón jo se 9. nowembra 1933 naroźił, jo wuknuł na gymnaziumje w měsće Dečin, a tam jo se zmakał z młodymi Serbami, ako su tam teke wuknuli. Pótom jo se wudał do města Liberec, źož jo pó lěśe 1945 pilnje studěrował – nejpjerwjej pedagogiku a pózdźej hyšći engelšćinu a sorabistiku. A teke tam jo se zeznał ze studentami z Łužyce, a jano jadno lěto jo trjebał, aby serbsku rěc wjelgin derje nawuknuł. Zachopił jo se interesěrowaś za Łužycu.