Kafej wari se w limbarskem gósćeńcu hyšći na kradu tradicionelnu wašnju: w glinjanem gjarncu. To wšyknym wjelgin derje słoźi. Horśikowa Regina (nalěwo) stara se wó kuchnju w gósćeńcu a se wuznajo, kak se taki kafej pśigótujo. Pśi wětšych zarědowanjach su pomagarje pśipódla, ako ta młoda žeńska napšawo. 
Z Limbarka/Limberg. Pšawy wejsny gósćeńc njejo wěcej wšuźi we našych jsach. W Limbarku na gluku hyšći jo. Gósćeńc „Lindenkrug“ z wjelikim zalom, kjarcmaŕskeju śpu a z towaristwowym rumom stoj pśi Barlinskej droze. To jo ta głowna droga, ako wjeźo wót Chóśebuza do Wětošowa a pón dalej do směra Barliń.
Lěc su to priwatny swěźeń abo za cełu wjas, burstak abo jěza pó zakopowanju, zapustowe reje, wustajeńca pjeriny, disco, gódownicka rentnarjow, 11. 11., kjarmuša, bal larbatych a tych wjele drugich zarědowanjow: Limbarski gósćeńc stoj k dispoziciji. Pśecej su tam pśijazne luźe, jo tam cyste a we zymjem topjone. Teke cuze luźe a kupki najmjeju ten zal za rejowańske zarědowanja. Tak na pśikład line-dancarje. Ten parket, pśijazne wobsłužowanje a moderatne płaśizny jich wabje.
Nejwósebnjejše znamje toś togo gósćeńca pak jo ta kjarcmaŕka sama. Lieschen Mužyk (Muschick) ga stoj hyšći z 91 lětami wěcej raz wob tyźeń wjacor za tejku. Limbarskim luźam jo wóna južo „institucija“, wjele luźi njeznajo tu kjarcmu bźez njeje. Wót lěta 1974 jo wóna kjarcmaŕka we tom gósćeńcu.
